老公陪我上梁醫生診所跟進抽針，梁醫生睇返上次乳健中心份報告再詳細同我解讀返一次。右邊胸有兩個腫瘤，一個2.4cm另一個1cm。暫時屬2期。
現階段抽針確定種類同治療方法，先手術切除再行化療還是先化療令腫瘤縮小再手術切除。考慮手術是否局部切除還是全部切除。是否選擇重建乳房。
當刻心情跌到低位，雖然已經預左工作保唔住，但8月完約前都應該唔會再返到公司。
再見喇，我工作了6年既地方。
梁醫生安排到附近診療中心抽針，因為只接待女性病人或家屬，老公只可以樓下等。都好，俾佢靜靜地釋放情緒。
抽針過程先打局部麻醉，就好似睇牙醫局部麻醉，感覺到錢醫生係身上操作，但只有極輕微痛感。醫生抽針時會聽到好似釘書機打落嚟啪一聲，打左四口釘就完。
傷口一日內唔好濕水，用防水膠布痴好。24小時後無流血就ok. 幾日內可能有瘀有分泌物經乳頭流出都係正常現象。
抽針後可以自行活動返屋企，留意唔好撞到傷口。（我哋仲食埋野先返屋企）
會有少少攰（可能緊張）返到去馬上瞓左陣。
大約下午5-6點可能麻醉針完全過哂。開始感覺到針口痛。好似打左個耳洞/乳環(?!)係胸邊皮膚。過一陣就無再痛。
但到暫時，最大問題係幾時同我細妹講……
沒有留言:
張貼留言